पाकिस्तानविरुद्ध फ्लॉप, पण ‘करो या मरो’ सामन्यात सेहवागच्या लेकाने मैदान गाजवलं! आशिया कपमध्ये ठोकलं वादळी शतक
आशिया कप 2026 मध्ये अंडर-19 संयुक्त अरब अमिराती (UAE) विरुद्धच्या सामन्यात आर्यवीर सेहवागने शानदार शतक झळकावले. माजी भारतीय क्रिकेटपटू वीरेंद्र सेहवागचा मुलगा असलेल्या आर्यवीरने आपल्या फलंदाजीने सर्वांचे लक्ष वेधून घेतले.
त्याने 131 चेंडूंमध्ये आपले शतक पूर्ण केले. या खेळीदरम्यान त्याने 13 चौकार आणि 2 षटकार ठोकले.
आर्यवीरच्या या खेळीत संयम आणि आक्रमकता यांचा सुरेख संगम पाहायला मिळाला. चांगल्या चेंडूंवर अनावश्यक फटके मारण्याचा मोह त्याने टाळला. काही चेंडू निर्धाव गेले तरी त्याने संयम सोडला नाही. मात्र, खराब चेंडू मिळताच त्याने चौकार आणि षटकारांची आतषबाजी केली. त्याच्या फलंदाजीमध्ये वडील वीरेंद्र सेहवाग यांची आक्रमक शैली आणि खेळाकडे पाहण्याचा दृष्टिकोन दिसून आला.
सुरुवातीला आर्यवीरने कर्णधार लक्ष्यसोबत पहिल्या विकेटसाठी 62 धावांची महत्त्वपूर्ण भागीदारी केली. त्यानंतर व्ही. के. विनीतसोबत दुसऱ्या विकेटसाठी शतकी भागीदारी रचत भारताची धावसंख्या मजबूत केली. आर्यवीरने वेगाने धावा जमवत भारतीय संघाला मोठ्या धावसंख्येच्या दिशेने नेले.
नेपाळविरुद्धही आर्यवीरची तुफानी खेळी
याआधी नेपाळविरुद्धच्या सामन्यातही आर्यवीरने आपल्या फलंदाजीची ताकद दाखवून दिली होती. त्याने अवघ्या 52 चेंडूंमध्ये नाबाद 70 धावांची आक्रमक खेळी केली होती. या खेळीत त्याने 7 चौकार आणि 4 षटकार ठोकले होते. त्याच्या या खेळीमुळे भारताने नेपाळविरुद्ध 10 विकेट्स राखून दणदणीत विजय मिळवला. विशेष म्हणजे, आर्यवीरने कर्णधार लक्ष्यसोबत 129 धावांची अभेद्य भागीदारी केली होती. लक्ष्यनेही 53 धावांची नाबाद खेळी साकारली होती.
पाकिस्तानविरुद्ध मात्र अपयश
नेपाळविरुद्ध धडाकेबाज कामगिरी करणाऱ्या आर्यवीरला पाकिस्तानविरुद्ध मात्र मोठी खेळी करता आली नव्हती. पाकिस्तानी वेगवान गोलंदाजांच्या आव्हानात्मक माऱ्याचा सामना करताना त्याने सुरुवातीला चांगला संयम दाखवला. मात्र, 40 चेंडूंमध्ये 22 धावा करून तो बाद झाला. या खेळीत त्याने एक चौकार आणि एक षटकार लगावला होता. चुकीचा फटका खेळून त्याने आपली विकेट गमावली. अन्यथा त्याला मोठी खेळी उभारण्याची संधी होती. मात्र, पाकिस्तानविरुद्धची निराशा मागे टाकत आर्यवीरने UAE विरुद्ध शतक झळकावून दमदार पुनरागमन केले आहे. त्यामुळे अंडर-19 आशिया कपमध्ये वीरेंद्र सेहवागचा मुलगा आर्यवीर चर्चेचा विषय ठरला आहे.
व्हाट्सअप ग्रुप जॉइनिंगसाठी क्लिक करा -
https://chat.whatsapp.com/BpTuswQo5JaGl3dMcIcFlK?s=cl&p=a&mlu=4&ilr=4
जाहिरातीसाठी संपर्क - 7620878766
विशेष टीप - बातमीतील जाहिरातीवर टॅप करून Preview Image हा पर्याय निवडा. त्यामुळे जाहिरात पूर्ण स्वरूपात उघडेल व आपणास प्रतिसाद देणे सोपे होईल.










