‘प्रेमसंबंध तोड, नाहीतर जीव घेईन’, बापाची धमकी पोरीनं हलक्यात घेतली, मध्यरात्री बापाने शब्द खरा करून दाखवला, घरातच लेकीची निर्घृण हत्या

घरात दिवाळीचा सण उत्साहात सुरू असताना बापाने आपल्या २१ वर्षीय लेकीची निर्घृण हत्या केल्याची धक्कादायक घटना उघडकीस आली आहे. बापाने मुलीची हत्या करण्यापूर्वी तिला जीवे मारण्याची धमकी दिली होती.
मात्र जन्मदाता बाप आपल्याशी असं काही करणार नाही, असं तरुणीला वाटलं. मात्र मध्यरात्री बापाने मुलीला गाठून तिची निर्घृण हत्या केली. हत्येनंतर आरोपीनं मुलीनं आत्महत्या केल्याचा बनाव रचला. मात्र त्याचा हा बनाव फार काळ टिकला नाही. पोलिसांनी त्याचं बिंग फोडलं आहे. पोलिसांनी आरोपी बापाला अटक केली असून पुढील तपास सुरू आहे.
ही खळबळजनक घटना गुजरातच्या आनंद जिल्ह्यातील मेटपूर गावात घडली आहे. सानिया पटेल असं मृत तरुणीचं नाव असून आरोपी वडिलांचं ना कौशल पटेल आहे. खंभात शहर पोलिसांनी आरोपी पिता कौशल पटेल याला अटक केली असून न्यायालयाने त्याला न्यायालयीन कोठडीत पाठवलं आहे.
नेमकी घटना कशी घडली?
पोलिसांनी दिलेल्या माहितीनुसार, मेटपूर गावात राहणाऱ्या कौशल पटेल याची २१ वर्षीय मुलगी सानियाचं गावातीलच एका तरुणाशी गेल्या वर्षभरापासून प्रेमसंबंध होते. मात्र, तो तरुण दुसऱ्या जातीचा असल्याने आणि त्याचा पगार १० ते १५ हजार रुपये असल्यानं कौशलचा या नात्याला तीव्र विरोध होता. वारंवार विरोध करूनही सानियाचं त्या तरुणाशी फोनवर बोलणं सुरूच होतं.
रविवारी संध्याकाळी संपूर्ण कुटुंबाने एकत्र दिवाळी साजरी केली आणि रात्री उशिरा सर्वजण झोपी गेले. दरम्यान, पहाटे सव्वातीन वाजताच्या सुमारास घरातील सर्वजण गाढ झोपेत असताना, कौशलने सानियाला स्वयंपाकघरात गाठले आणि तिच्या प्रेमसंबंधांवरून पुन्हा जाब विचारला.
धमकीला मुलीने हलक्यात घेतलं
वाद वाढल्याने संतापलेल्या कौशलने सानियाला गळा आवळून मारण्याची धमकी दिली. मात्र, वडिलांची ही धमकी सानियाने केवळ थट्टा समजून दुर्लक्षित केली. याच गोष्टीचा राग आल्याने कौशलने सानियाची ओढणी पकडली आणि तिचा गळा आवळला. सानिया जमिनीवर कोसळेपर्यंत त्याने ओढणीचा फास घट्ट धरून ठेवला होता, ज्यामुळे तिचा जागीच मृत्यू झाला.
आत्महत्या भासवण्याचा प्रयत्न, पण पोस्टमार्टमने पोलखोल केली
हत्येनंतर, मुलीने आत्महत्या केल्याचं भासवण्याचा कट रचण्यात आला. पहाटे ५ वाजताच्या सुमारास कौशलनं व त्याच्या कुटुंबीयांनी सानियाचा मृतदेह खंभात जनरल हॉस्पिटलमध्ये नेला आणि तिने गळफास घेऊन आत्महत्या केल्याचा दावा केला. मात्र, रुग्णालयातील डॉक्टरांना प्रकृती संशयास्पद वाटल्याने त्यांनी फॉरेन्सिक शवविच्छेदन करण्याची शिफारस केली. त्यानुसार मृतदेह करमसद येथील श्री कृष्ण रुग्णालयात पाठवण्यात आला. पोस्टमार्टम रिपोर्टमध्ये सानियाचा मृत्यू गळा दाबल्यामुळे झाल्याचे स्पष्ट झाल्यानंतर पोलिसांनी कसून चौकशी सुरू केली.
पोलिसांसमोर आरोपी वडिलांची कबुली
पोलिसांच्या कडक चौकशीत आरोपी पिता कौशल पटेल याने गुन्ह्याची कबुली दिली. पोलिसांनी खुनासाठी वापरलेली ओढणी आणि इतर पुरावे जप्त केले आहेत. खंभात शहर पोलीस ठाण्याचे निरीक्षक पी. जे. बंटवा यांनी सांगितले की, आंतरजातीय संबंधांच्या वादातून हा खून झाला आहे. सानियाने बडोदा येथून बी.कॉम.चे शिक्षण पूर्ण केलं होतं आणि ती पुढील शिक्षण घेत होती. कोर्टाने आरोपी बापाला न्यायालयीन कोठडीत पाठवलं आहे.
व्हाट्सअप ग्रुप जॉइनिंगसाठी क्लिक करा -
https://chat.whatsapp.com/BpTuswQo5JaGl3dMcIcFlK?s=cl&p=a&mlu=4&ilr=4
जाहिरातीसाठी संपर्क - 7620878766
विशेष टीप - बातमीतील जाहिरातीवर टॅप करून Preview Image हा पर्याय निवडा. त्यामुळे जाहिरात पूर्ण स्वरूपात उघडेल व आपणास प्रतिसाद देणे सोपे होईल.










