जामनेर (प्रतिनिधी) –
राजकारणातील दोन कट्टर राजकीय विरोधक म्हणून ओळखले जाणारे राष्ट्रवादी शरदचंद्र पवार पक्षाचे आमदार एकनाथ खडसे आणि भाजप नेते तथा जलसंपदा मंत्री गिरीश महाजन यांच्यात नव्या राजकीय समीकरणांची नांदी पाहायला मिळत आहे.
एकनाथ खडसे यांच्या अमृत महोत्सवी कार्यक्रमाचे निमंत्रण देण्यासाठी त्यांचे स्वीय सहाय्यक योगेश कोलते आणि सुनील नेवे यांनी जामनेर येथे जाऊन गिरीश महाजन यांची भेट घेतली होती. या भेटीत त्यांनी महाजन यांना कार्यक्रमाला उपस्थित राहण्याची विनंती केली होती. त्यावेळी सर्वपक्षीय नेते या कार्यक्रमाला उपस्थित राहणार असल्याचे सांगत स्वागत समितीत त्यांचे नाव समाविष्ट करण्याची विनंतीही करण्यात आली होती.
मात्र त्यावर गिरीश महाजन यांनी “समितीत माझं नाव नको, तुम्हाला तर सगळी पार्श्वभूमी माहितीच आहे,” असे उत्तर दिले होते.
दरम्यान, एकनाथ खडसे आणि गिरीश महाजन हे उत्तर महाराष्ट्राच्या राजकारणातील कट्टर राजकीय प्रतिस्पर्धी मानले जातात. अनेक वर्षांपासून दोन्ही नेत्यांमध्ये आरोप-प्रत्यारोप सुरू आहेत. त्यामुळे खडसेंच्या वतीने महाजनांना निमंत्रण देण्यात आल्यानंतर दोन्ही नेत्यांमधील संबंधांबाबत विविध राजकीय चर्चा सुरू झाल्या होत्या.
काही दिवसांपूर्वी एकनाथ खडसे यांनी अमित शाह यानीच आपल्याला भारतीय जनता पक्षात परत येण्याचा सल्ला दिल्याचा दावा केला होता. त्यानंतर महाजनांना कार्यक्रमाचे निमंत्रण दिल्याने खडसेंच्या संभाव्य राजकीय भूमिकेबाबतही विविध तर्क-वितर्क लावले जात होते. मात्र, आता गिरीश महाजन यांनी महत्त्वाच्या कामामुळे कार्यक्रमाला उपस्थित राहता येणार नसल्याचे स्पष्ट केले आहे.
व्हाट्सअप ग्रुप जॉइनिंगसाठी क्लिक करा -
https://chat.whatsapp.com/HMA5zhKgkFb0dM17DmmjRb
जाहिरातीसाठी संपर्क - 7620878766
विशेष टीप - बातमीतील जाहिरातीवर टॅप करून Preview Image हा पर्याय निवडा. त्यामुळे जाहिरात पूर्ण स्वरूपात उघडेल व आपणास प्रतिसाद देणे सोपे होईल.
