RPFचा बनावट गणवेश घालून रेल्वेस्थानकात फिरणारी २१ वर्षीय तरुणी ताब्यात; लग्नासाठी करत होती दिशाभूल

RPFचा बनावट गणवेश घालून रेल्वेस्थानकात फिरणारी २१ वर्षीय तरुणी ताब्यात; लग्नासाठी करत होती दिशाभूल

जळगाव : रेल्वे सुरक्षा दलाचा (RPF) गणवेश परिधान करून जळगाव रेल्वेस्थानकावर संशयास्पदरीत्या फिरणाऱ्या २१ वर्षीय तरुणीला रेल्वे सुरक्षा दलाने ताब्यात घेतल्याने खळबळ उडाली आहे. विशेष म्हणजे, संबंधित तरुणीने आपण नाशिक येथे RPFमध्ये कार्यरत असल्याचा दावा केला; मात्र अधिकाऱ्यांनी केलेल्या पडताळणीत तिच्या नावाची कोणतीही महिला RPFमध्ये कार्यरत नसल्याचे स्पष्ट झाले. विवाहाच्या उद्देशाने लोकांना प्रभावित करण्यासाठी आणि स्वतःची दिशाभूल करणारी ओळख निर्माण करण्यासाठी तिने यापूर्वी महाराष्ट्र पोलिसांचा गणवेश परिधान करून छायाचित्रे काढल्याची धक्कादायक माहितीही चौकशीत समोर आली.

ही कारवाई मध्य रेल्वेच्या भुसावळ विभागातील रेल्वे सुरक्षा दलाने ‘ऑपरेशन सतर्क’ अंतर्गत दक्षता व सुरक्षा तपासणीदरम्यान केली. या प्रकरणी संबंधित तरुणीविरुद्ध शासकीय रेल्वे पोलिसांकडे गुन्हा दाखल करण्यात आला आहे.

फलाटावर संशयास्पद हालचाली; RPFच्या पथकाची नजर

जळगाव रेल्वेस्थानकाच्या फलाट क्रमांक ३ वर रेल्वे सुरक्षा दलाचे अधिकारी व कर्मचारी सुरक्षा आणि दक्षता तपासणी करीत होते. यावेळी RPFचा गणवेश परिधान केलेली एक महिला संशयास्पद पद्धतीने फिरताना कर्मचाऱ्यांच्या निदर्शनास आली.

संशय बळावल्यानंतर कर्मचाऱ्यांनी तिला थांबवून तिची चौकशी केली. गणवेशावरील नेमप्लेटवर ‘मनीषा कविता युवराज गोपाल’ असे नाव नमूद होते. ती RPFची कर्मचारी असल्याचा दावा करीत होती; मात्र नियुक्ती, पद आणि ओळख यासंदर्भात विचारणा केल्यानंतर तिला समाधानकारक माहिती देता आली नाही.

वैध ओळखपत्र मागितले, पण दाखवू शकली नाही

RPF कर्मचाऱ्यांनी तिच्याकडे अधिकृत ओळखपत्राची मागणी केली. मात्र संबंधित तरुणीला RPFचे कोणतेही वैध ओळखपत्र सादर करता आले नाही. त्यामुळे अधिकाऱ्यांचा संशय आणखी बळावला.

चौकशीदरम्यान तिने आपली नियुक्ती RPF, नाशिक येथे असल्याचे सांगितले. त्यानंतर जळगाव RPFने तत्काळ नाशिक येथील संबंधित अधिकाऱ्यांशी संपर्क साधून तिच्या नियुक्तीची माहिती पडताळून पाहिली. या पडताळणीत ‘मनीषा कविता युवराज गोपाल’ या नावाची कोणतीही महिला RPFमध्ये कार्यरत नसल्याचे समोर आले.

बनावट कागदपत्रेही आढळली

तपासणीदरम्यान संबंधित तरुणीकडे बनावट चारित्र्य प्रमाणपत्र आणि पोलिस पडताळणीची प्रत आढळून आली. त्यामुळे हे प्रकरण केवळ बनावट गणवेशापुरते मर्यादित नसून त्यामागे आणखी काही उद्देश होता का, याचा तपास करण्याची गरज निर्माण झाली.

प्रकरणाचे गांभीर्य लक्षात घेऊन RPFने संबंधित माहिती, कागदपत्रे आणि तरुणीला पुढील कायदेशीर कारवाईसाठी शासकीय रेल्वे पोलिसांच्या ताब्यात दिले.

जामनेर तालुक्यातील तरुणी; लग्नासाठी करत होती दिशाभूल

चौकशीत संबंधित तरुणीने आपले नाव मनीषा युवराज गोपाल (वय २१) असून ती कापूसवाडी, ता. जामनेर येथील रहिवासी असल्याचे सांगितले.

चौकशीत आणखी धक्कादायक माहिती समोर आली. विवाहाच्या उद्देशाने संभाव्य स्थळांवर आपली सामाजिक प्रतिष्ठा आणि नोकरीबाबत प्रभाव निर्माण करण्यासाठी तिने यापूर्वी महाराष्ट्र पोलिसांचा गणवेश परिधान करून छायाचित्रे काढली असल्याचे समोर आले आहे. त्यामुळे तिने संबंधित गणवेश आणि बनावट ओळखीचा वापर नेमका किती काळ व कोणकोणत्या ठिकाणी केला, याचा तपास आता पोलिसांकडून केला जात आहे.

बनावट ओळख कशासाठी? तपास सुरू

RPFचा गणवेश मिळवण्यामागे नेमका उद्देश काय होता, बनावट कागदपत्रे तिने स्वतः तयार केली की कुणाच्या मदतीने मिळवली, तसेच या बनावट ओळखीचा वापर करून तिने यापूर्वी कोणाची फसवणूक केली आहे का, याबाबत रेल्वे पोलिसांकडून तपास सुरू आहे.

जळगाव रेल्वेस्थानकावर दक्षता तपासणीदरम्यान RPF कर्मचाऱ्यांच्या सतर्कतेमुळे बनावट ओळख धारण करणाऱ्या तरुणीचा प्रकार उघडकीस आला. त्यामुळे ‘ऑपरेशन सतर्क’अंतर्गत रेल्वे सुरक्षा दलाची दक्षता पुन्हा एकदा अधोरेखित झाली आहे.