श्रीलंकेविरुद्धच्या कसोटी मालिकेसाठी भारतीय संघ जाहीर; जडेजाचे पुनरागमन, राहुल नवे उपकर्णधार

नवी दिल्ली : श्रीलंकेविरुद्ध पुढील महिन्यात होणाऱ्या दोन सामन्यांच्या कसोटी मालिकेसाठी भारतीय क्रिकेट नियामक मंडळाने (BCCI) भारतीय संघाची घोषणा केली आहे. शुभमन गिलच्या नेतृत्वाखाली मैदानात उतरणाऱ्या संघात अनुभवी अष्टपैलू रवींद्र जडेजा याचे पुनरागमन झाले असून, सर्वाधिक चर्चेचा विषय ठरला तो म्हणजे लोकेश राहुलची उपकर्णधारपदी झालेली नियुक्ती.

जागतिक कसोटी अजिंक्यपद (WTC) स्पर्धेच्या अंतिम फेरीतील स्थान मजबूत करण्यासाठी ही मालिका भारतासाठी अत्यंत महत्त्वाची मानली जात आहे. त्यामुळे अनुभवी आणि युवा खेळाडूंचा समतोल साधत निवड समितीने संघाची बांधणी केली आहे.

संघात जसप्रीत बुमराह आणि साई सुदर्शन यांचा समावेश करण्यात आला असला, तरी दोघांच्या अंतिम सहभागावर त्यांच्या फिटनेस अहवालानंतरच शिक्कामोर्तब होणार आहे. इंग्लंडविरुद्धच्या वनडे मालिकेत दुखापतीमुळे बाहेर राहिलेल्या बुमराहच्या तंदुरुस्तीवर सर्वांचे लक्ष लागले आहे.

दुखापतीमुळे वॉशिंग्टन सुंदर पहिल्या कसोटीला मुकणार असल्याने त्याच्या जागी युवा फिरकीपटू सारांश जैन याला संधी देण्यात आली आहे. श्रीलंका ‘अ’ विरुद्धच्या चार दिवसीय सामन्यात भारत ‘अ’ संघाकडून खेळताना सारांशने दोन्ही डावांत मिळून ६ विकेट्स घेतल्या होत्या. तसेच दुसऱ्या डावात नाबाद ७० धावांची महत्त्वपूर्ण खेळी करत त्याने निवड समितीचे लक्ष वेधून घेतले. श्रीलंकेच्या संघात डावखुऱ्या फलंदाजांची संख्या अधिक असल्याने त्याची निवड महत्त्वाची मानली जात आहे.

यष्टिरक्षक म्हणून रिषभ पंत हा प्रमुख पर्याय असेल, तर ध्रुव जुरेल राखीव यष्टिरक्षक-फलंदाजाची भूमिका पार पाडणार आहे.

वेगवान गोलंदाजीची धुरा बुमराहच्या उपलब्धतेवर अवलंबून असली तरी मोहम्मद सिराज, प्रसिद्ध कृष्णा आणि गुरनूर ब्रार यांच्यावर मोठी जबाबदारी असेल. फिरकी आक्रमणाची जबाबदारी रवींद्र जडेजा, कुलदीप यादव, मानव सुथार आणि सारांश जैन सांभाळतील.

भारत विरुद्ध श्रीलंका कसोटी मालिकेचे वेळापत्रक

पहिली कसोटी: 15 ते 19 ऑगस्ट – गॉल

दुसरी कसोटी: 23 ते 27 ऑगस्ट – कोलंबो

भारतीय संघ

शुभमन गिल (कर्णधार), लोकेश राहुल (उपकर्णधार), यशस्वी जैस्वाल, रिषभ पंत, साई सुदर्शन*, ध्रुव जुरेल, रवींद्र जडेजा, कुलदीप यादव, मानव सुथार, जसप्रीत बुमराह*, मोहम्मद सिराज, प्रसिद्ध कृष्णा, गुरनूर ब्रार, देवदत्त पडिक्कल आणि सारांश जैन.

* अंतिम सहभाग फिटनेस अहवालावर अवलंबून.