जळगावमध्ये 2 हजार महिलांनी नाकारली ‘लाडकी बहीण’ योजना; महिला व बालकल्याण विभागाकडे अर्ज

जळगावमध्ये 2 हजार महिलांनी नाकारली ‘लाडकी बहीण’ योजना; महिला व बालकल्याण विभागाकडे अर्ज

जळगाव : राज्य सरकारच्या महत्त्वाकांक्षी मुख्यमंत्री माझी लाडकी बहीण योजनेबाबत जळगाव जिल्ह्यातून एक वेगळीच बाब समोर आली आहे. राज्यभरात लाखो महिलांना योजनेचा लाभ बंद झाल्याने नाराजी व्यक्त होत असताना, जळगाव जिल्ह्यात तब्बल 2 हजार महिलांनी स्वेच्छेने लाडकी बहीण योजनेचा लाभ नको असल्याचे सांगत महिला व बाल विकास विभागाकडे अर्ज सादर केले आहेत.
या महिलांनी संजय गांधी निराधार योजनेचा लाभ मिळविण्यासाठी लाडकी बहीण योजनेतून बाहेर पडण्याचा निर्णय घेतला आहे. शासनाच्या नियमानुसार एका लाभार्थीला एकाच वेळी दोन समान स्वरूपाच्या योजनांचा लाभ घेता येत नसल्याने महिलांनी हा पर्याय स्वीकारला आहे.
विधानसभा निवडणुकांपूर्वी सुरू करण्यात आलेल्या लाडकी बहीण योजनेला राज्यभरातून मोठा प्रतिसाद मिळाला होता. सुरुवातीच्या टप्प्यात मोठ्या प्रमाणावर महिलांची नोंदणी करण्यात आली होती. मात्र, त्यानंतर लाभार्थ्यांची पडताळणी सुरू झाल्यानंतर अनेक महिलांना विविध कारणांमुळे योजनेतून वगळण्यात आले आहे.
राज्य सरकारने नियमांची कडक अंमलबजावणी सुरू केल्यानंतर सुमारे 92 लाख महिलांचा लाभ थांबविण्यात आल्याचे सांगितले जात आहे. यामध्ये केवायसी अपूर्ण असणे, चारचाकी वाहनाची नोंद, उत्पन्नाची मर्यादा ओलांडणे किंवा इतर पात्रतेच्या निकषांमध्ये न बसणे अशी विविध कारणे समोर आली आहेत.
दरम्यान, जळगावमधील अनेक महिलांनी यापूर्वीच संजय गांधी निराधार योजनेसाठी अर्ज केले होते. त्या अर्जांना मंजुरी मिळाल्यानंतर दोन्ही योजनांचा लाभ एकाच वेळी घेता येत नसल्याने त्यांनी लाडकी बहीण योजनेचा लाभ बंद करण्याची लेखी विनंती महिला व बाल विकास विभागाकडे केली आहे.
जिल्हा महिला व बालकल्याण अधिकारी ऋषिकेश काळे यांनी सांगितले की, जिल्ह्यातील सुमारे दोन हजार महिलांनी संजय गांधी निराधार योजनेचा लाभ स्वीकारण्यासाठी लाडकी बहीण योजनेतून बाहेर पडण्याचे अर्ज सादर केले आहेत.
दुसरीकडे, काही महिलांनी केवायसी पूर्ण करूनही तांत्रिक अडचणींमुळे लाभ मिळत नसल्याची तक्रार केली आहे. त्यामुळे अशा महिला शासकीय कार्यालयांमध्ये वारंवार फेऱ्या मारत असून, प्रशासनाकडे आपली नाराजी व्यक्त करत आहेत.