पुण्याचे जगदीश आफळे अयोध्येतील राम मंदिर ट्रस्टच्या सचिवपदाची जबाबदारी स्वीकारणार

पुण्याचे जगदीश आफळे कोण आहेत? अयोध्या राम मंदिर ट्रस्टच्या सचिवपदाची जबाबदारी स्वीकारणार

१९८९ मधील रामशिला पूजनापासून अयोध्येतील मंदिर उभारणीपर्यंतचा प्रदीर्घ प्रवास; IIT बॉम्बेचे माजी विद्यार्थी आणि RSSचे निष्ठावान कार्यकर्ते

पुणे : अयोध्येतील भव्य श्री राम जन्मभूमी मंदिराच्या प्रशासकीय आणि धोरणात्मक व्यवस्थापनाची महत्त्वाची जबाबदारी आता पुण्याचे रहिवासी जगदीश आफळे यांच्या खांद्यावर येण्याची शक्यता आहे. ‘श्री राम जन्मभूमी तीर्थ क्षेत्र ट्रस्ट’च्या सचिवपदासाठी त्यांच्या नावाचा प्रस्ताव मांडण्यात आला असून, २ सप्टेंबर २०२६ रोजी याबाबत अधिकृत घोषणा होण्याची शक्यता आहे.

राम मंदिराच्या प्रशासकीय व्यवस्थेत पारदर्शकता आणि कार्यक्षमता वाढवण्याच्या उद्देशाने ट्रस्टने सचिव आणि प्रवक्ता अशी नवीन पदे निर्माण करण्याचा निर्णय घेतल्याचे सांगण्यात येत आहे. २२ जुलै २०२६ रोजी झालेल्या बैठकीत सचिवपदासाठी जगदीश आफळे यांचे नाव एकमताने सुचवण्यात आल्याची माहिती ट्रस्टचे अंतरिम सरचिटणीस कृष्ण मोहन यांनी दिल्याचे वृत्त आहे. सध्या त्यांच्या औपचारिक निवडीची प्रक्रिया सुरू असल्याचेही सांगण्यात येते.

कोण आहेत जगदीश आफळे ?

मूळचे पुण्यातील पद्मावती भागातील रहिवासी असलेले जगदीश आफळे हे शिक्षणाने अभियंता आहेत. त्यांनी आयआयटी बॉम्बे येथून इलेक्ट्रिकल इंजिनिअरिंगमध्ये बी.टेक आणि एम.टेक पदवी प्राप्त केली आहे. भारतासह युरोप आणि अमेरिकेतील आघाडीच्या तंत्रज्ञान कंपन्यांमध्ये त्यांनी काम केले आहे.

अमेरिकेत वास्तव्यास असताना आफळे दाम्पत्याने राष्ट्रीय स्वयंसेवक संघासाठी (RSS) सुमारे तीन वर्षे पूर्णवेळ ‘विस्तारक’ म्हणून काम केले. त्यांच्या पत्नी माधुरी आफळे यांनाही मंदिर वास्तुकला आणि शिल्पकलेचा विशेष अभ्यास व अनुभव असल्याचे सांगितले जाते. अयोध्येतील राम मंदिराच्या उभारणीच्या काळात दोघांनीही आपापल्या क्षेत्रातून योगदान दिले.

१९८९ पासून राम मंदिर आंदोलनाशी नाते

जगदीश आफळे यांचा राम मंदिर चळवळीशी गेल्या तीन दशकांहून अधिक काळापासून संबंध आहे. १९८९ मध्ये झालेल्या ‘रामशिला पूजन’ कार्यक्रमाच्या काळात त्यांनी पुण्यातून अयोध्येपर्यंत रामशिला नेण्याची सेवा केली होती. त्यानंतर लालकृष्ण अडवाणी यांच्या रथयात्रेत तसेच १९९१-९२ मधील कारसेवेतही त्यांनी सहभाग घेतल्याचे सांगितले जाते.

कॉर्पोरेट क्षेत्र सोडून अयोध्येत सेवा

राम मंदिराच्या बाजूने सर्वोच्च न्यायालयाचा ऐतिहासिक निकाल आल्यानंतर मंदिर उभारणीचा मार्ग मोकळा झाला. यानंतर जगदीश आफळे यांनी आपली कॉर्पोरेट कारकीर्द सोडून अयोध्येत काम करण्याचा निर्णय घेतला. मंदिर उभारणीच्या सुरुवातीच्या टप्प्यापासून त्यांनी प्रकल्प व्यवस्थापक म्हणून महत्त्वाची भूमिका बजावली.

अयोध्येतील राम मंदिराच्या उभारणीपासून ते सध्याच्या प्रशासकीय व्यवस्थेपर्यंतचा त्यांचा प्रवास पाहता, सचिवपदाची जबाबदारी त्यांच्याकडे सोपवली जाणे महत्त्वाचे मानले जात आहे. सचिव म्हणून त्यांची नियुक्ती झाल्यास ट्रस्टच्या प्रशासकीय कामकाजात समन्वय, पारदर्शकता आणि कार्यक्षमतेची जबाबदारी त्यांच्या खांद्यावर असेल.