निर्माता मिळेना, मनमाडच्या 3 भावांनी कर्ज काढून बनवला सिनेमा, 5 राज्य पुरस्कार मिळवणाऱ्या ‘छबिला’ची पडद्यामागची गोष्ट

मुंबईत नुकताच महाराष्ट्र राज्य मराठी चित्रपट पुरस्कार सोहळा पार पडला. या सोहळ्यात ‘छबिला’ हा सर्वोत्कृष्ट चित्रपटाचा प्रथम पुरस्कार मिळाला. या सिनेमाचं एक नाही तर तब्बल पाच राज्य पुरस्कार पटकावले.

अनिल भालेराव यांना सर्वोत्कृष्ट दिग्दर्शक प्रथम पुरस्कार आणि सर्वोत्कृष्ट प्रथम पदार्पण दिग्दर्शक पुरस्काराने गौरवण्यात आलं. अभिनेत्री स्वाती गोतावळे यांना सर्वोत्कृष्ट अभिनेत्रीचा पुरस्कार मिळाला, तर सतीश दडस यांना उत्कृष्ट ध्वनीमुद्रणासाठी पुरस्कार प्रदान करण्यात आला. ‘छबिला’ हे नाव अचानक प्रेक्षकांसमोर आलं. हा सिनेमा नेमका काय आहे? सिनेमाच्या मागची इनसाइड स्टोरी देखील खूप इंटरेस्टिंग आहे.

मनमाडजवळील अनकवाडे गावातील रघुवीर तांड्यातून आलेल्या तीन भावांनी आपल्या जिद्दीच्या जोरावर मराठी चित्रपटसृष्टीत वेगळी ओळख निर्माण केली आहे. दिग्दर्शक अनिल अमृत भालेराव यांच्या ‘छबिला’ या मराठी चित्रपटाने ६२व्या महाराष्ट्र राज्य मराठी चित्रपट पुरस्कारांमध्ये तब्बल 5 पुरस्कार पटकावत ऐतिहासिक यश मिळवलं. विशेष म्हणजे, या चित्रपटासाठी निर्माता मिळत नसताना अनिल, अजय आणि अरुण अमृत भालेराव या तीन भावांनी स्वतः कर्ज काढून चित्रपटाची निर्मिती केली. मर्यादित साधनं आणि आर्थिक अडचणी असतानाही तब्बल 25 वर्षांचं स्वप्न त्यांनी पूर्ण केलं.

( गायक बनण्याचं स्वप्न अधुरं, बनला फिल्मी दुनियेचा पोलीसवाला; 400 फिल्ममध्ये केली एकच भूमिका )

‘छबिला’मध्ये विनय धाकडे, दिलीप डोंबे, राजकिरण कुंभारिकर, देवा पांडे, महेश घुमरे, काजल परदेशी, ईश्वर मोरे, सचिन पाटील, राजश्री पाटील आणि भाग्यश्री पाटील यांसारख्या कलाकारांच्या महत्त्वाच्या भूमिका आहेत.

आपल्या समाजाचं वास्तव मोठ्या पडद्यावर मांडावं, मातीशी जोडलेली कथा सांगावी, असं स्वप्न त्यांच्या मनात अनेक वर्षांपासून होतं. त्यातूनच ‘छबिला’ची संकल्पना आकाराला आली. मात्र वास्तववादी विषय असल्यामुळे चित्रपटासाठी निर्माता मिळणं कठीण झालं. आर्थिक अडचणीही समोर होत्या. तरीही भालेराव बंधूंनी आपलं स्वप्न सोडलं नाही. अखेर त्यांनी स्वतः कर्ज घेतलं आणि स्वतःच्या जबाबदारीवर हा चित्रपट उभा केला.