पोलीस स्मृतिदिनानिमित्त १५४ पोलीस हुतात्म्यांना मुख्यमंत्र्यांकडून आदरांजली

कर्तव्य बजावताना प्राणांची आहुती देणाऱ्या शूर पोलीस हुतात्म्यांना आज पोलीस स्मृतिदिनानिमित्त (Police Commemoration Day) कृतज्ञतापूर्वक अभिवादन करण्यात आले.

मुख्यमंत्री देवेंद्र फडणवीस (CM Devendra Fadnavis) यांनी नायगाव पोलीस मुख्यालय येथील पोलीस स्मृतीस्तंभावर पुष्पचक्र वाहून गेल्या वर्षभरात संपूर्ण देशात शहीद झालेल्या पोलीस जवानांना विनम्र श्रद्धांजली अर्पण केली.

याप्रसंगी हुतात्म्यांच्या त्यागाचे स्मरण करताना मुख्यमंत्री म्हणाले, “असीम ध्येयनिष्ठेने कर्तव्य बजावताना वीरगती प्राप्त झालेल्या ३६ पोलीस अधिकारी आणि ११८ पोलीस अंमलदार अशा एकूण १५४ पोलीस हुतात्म्यांच्या पवित्र स्मृतींना मी विनम्रपणे अभिवादन करतो.”

या स्मृतिदिन संचलन कार्यक्रमास विधानसभा अध्यक्ष ॲड. राहुल नार्वेकर, मुंबई उपनगर जिल्ह्याचे सहपालकमंत्री मंगल प्रभात लोढा, महापौर रितू तावडे, गृह विभागाच्या अपर मुख्य सचिव मनीषा पाटणकर-म्हैसकर, पोलीस महासंचालक सदानंद दाते आणि मुंबईचे पोलीस आयुक्त देवेन भारती (Deven Bharti) उपस्थित होते. या सर्व मान्यवरांनी स्मृतीस्तंभास पुष्पचक्र वाहून आदरांजली वाहिली. यावेळी पोलीस दलाच्या वतीने हवेत बंदुकीच्या तीन फैरी झाडून हुतात्म्यांना मानवंदना देण्यात आली.

शहीद कुटुंबीयांची मुख्यमंत्र्यांनी घेतली भेट

या कार्यक्रमाला विविध देशांच्या दूतावासातील निमंत्रित अधिकारी, वरिष्ठ पोलीस अधिकारी आणि शहीद पोलिसांचे कुटुंबीय मोठ्या संख्येने उपस्थित होते. मुख्यमंत्री फडणवीस यांनी शहीद जवानांच्या कुटुंबीयांची प्रत्यक्ष भेट घेऊन त्यांचे सांत्वन केले व कृतज्ञता व्यक्त केली. या संचलन कार्यक्रमाचे यशस्वी संयोजन अपर पोलीस महासंचालक (प्रशासन) मधुकर पाण्डेय आणि विशेष पोलीस महानिरीक्षक (प्रशासन) अभिषेक त्रिमुखे यांनी केले.

२१ ऑक्टोबर: पोलीस स्मृतिदिनाची पार्श्वभूमी

कर्तव्य बजावताना सर्वोच्च बलिदान देणाऱ्या शूरवीर पोलिसांच्या स्मरणार्थ दरवर्षी २१ ऑक्टोबर रोजी देशभरात ‘पोलीस स्मृतीदिन संचलन’ आयोजित केले जाते. या वर्षीच्या संचलनात १ सप्टेंबर २०२५ ते ३१ ऑगस्ट २०२६ या कालावधीत देशसेवेसाठी वीरमरण आलेल्या विविध राज्य पोलीस दल आणि निमलष्करी दलांतील शूर जवानांचा सन्मान करण्यात आला.