जळगाव : तरुणीच्या फिल्मी स्टाईल भूमिकेने पोलीसही चक्रावले: अपहरण–बलात्काराच्या तक्रारीनंतर थेट तरुणाच्या घरी वास्तव्य

तीन महिन्यांनंतर तरुणी थेट संशयित तरुणाच्या घरी दाखल; आई-वडिलांशी चर्चा करण्यास नकार देत दिले लेखी उत्तर

जळगाव : अपहरण करून गुंगीचे औषध पाजल्याचा, बेशुद्धावस्थेत आळंदी येथे विवाह लावल्याचा आणि पुणे येथे अत्याचार केल्याचा आरोप करत एका तरुणासह त्याच्या कुटुंबातील १० जणांविरुद्ध पोलिसांत फिर्याद देणारी तरुणी तब्बल तीन महिन्यांनंतर संबंधित तरुणाच्या घरी पोहचल्याने रावेर तालुक्यात खळबळ उडाली आहे. विशेष म्हणजे, तिने पोलिसांसमोर दिलेल्या जबाबात आपण सज्ञान असून स्वतःच्या इच्छेने संबंधित तरुणासोबत राहण्यास जात असल्याचे लेखी नमूद केले आहे. त्यामुळे या प्रकरणाला नवे वळण मिळाले आहे. तरुणीच्या बदललेल्या भूमिकेने पोलीसही चक्रावले आहेत.

रावेर तालुक्यातील एका गावातील तरुणाविरुद्ध तसेच त्याचे भाऊ, चुलतभाऊ, वहिनी, वडील, काका आणि मावसभाऊ अशा कुटुंबातील एकूण १० जणांविरुद्ध संबंधित तरुणीच्या फिर्यादीवरून काही महिन्यांपूर्वी गुन्हा दाखल करण्यात आला होता. या फिर्यादीत तिने हतनूर पुलाजवळून आपले अपहरण करण्यात आल्याचा आरोप केला होता. त्यानंतर आपल्याला गुंगीचे औषध पाजण्यात आले आणि बेशुद्धावस्थेत आळंदी येथे विवाह लावण्यात आला. तसेच पुण्यात अत्याचार करण्यात आल्याचेही तिने पोलिसांना सांगितले होते. दरम्यान, १ सप्टेंबर रोजी संबंधित तरुणी आरोपी तरुणाच्या घरी आल्याची माहिती रावेर पोलिसांना मिळाली. माहिती मिळताच पोलिसांनी तातडीने महिला पोलीस कर्मचाऱ्यांसह पथक पाठविले. तरुणीला पोलीस ठाण्यात आणल्यानंतर तिचा जबाबनोंदविण्यात आला. यावेळी दोन्ही कुटुंबीयांनाही पोलिसांनी बोलावून घेतले.

जबाबात स्वेच्छेने राहण्याचे नमूद

पोलिसांसमोर दिलेल्या जबाबात तरुणीने आपण सज्ञान असल्याचे सांगत संबंधित तरुणासोबत स्वतःच्या इच्छेने राहण्याचा निर्णय घेतल्याचे नमूद केले. तसेच आई-वडिलांशी चर्चा करण्यासही तिने नकार दिल्याची माहिती पोलिस सूत्रांनी दिली. यामुळे काही महिन्यांपूर्वी दाखल केलेल्या गंभीर आरोपांच्या पार्श्वभूमीवर तिच्या सध्याच्या भूमिकेमुळे अनेक प्रश्न उपस्थित झाले आहेत. या प्रकरणात यापूर्वी करण्यात आलेले आरोप आणि आता तरुणीने पोलिसांसमोर दिलेला जबाब यामध्ये स्पष्ट फरक दिसून येत आहे. त्यामुळे पोलिसांकडून पूर्वीची फिर्याद, सध्याचा जबाब आणि संबंधितव्यक्तींकडून मिळणारी माहिती यांचा कायदेशीर प्रक्रियेनुसार विचार केला जाणार आहे. या प्रकरणातील आरोप अद्याप न्यायालयात सिद्ध झालेले नाहीत.