पितृपक्षाच्या पावन पर्वावर ब्राह्मण सभा व मांगल्य सेवा संस्थेतर्फे गरजूंना धान्य व शिध्याचे मोफत वितरण

सर्वपित्री अमावस्येला सेवाभावी सामाजिक उपक्रम; ब्राह्मण सभेच्या सहकार्याने उपक्रम उत्स्फूर्तपणे संपन्न

जळगाव, दि. ११ ( प्रतिनिधी ) — पितृपक्षाच्या पावन पर्वावर सर्वपित्री अमावस्येचे औचित्य साधून मांगल्य सेवा संस्थेतर्फे १० ऑक्टोबर रोजी ब्राह्मण सभेत समाजातील गरजू कुटुंबांना धान्य व जीवनावश्यक किराणा वस्तूंच्या शिध्याचे मोफत वितरण करण्यात आले. आपल्या वाडवडिलांच्या स्मृतीप्रित्यर्थ गरजू व्यक्तींना मदतीचा हात द्यावा, या उद्देशाने संस्थेने केलेल्या आवाहनाला समाजातून उत्स्फूर्त प्रतिसाद मिळाला. त्यातून ब्राह्मण सभेच्या संयुक्त सहकार्याने हा सामाजिक उपक्रम यशस्वीपणे राबविण्यात आला.

प्रार्थनेने कार्यक्रमाची सुरुवात

कार्यक्रमाची सुरुवात सायंकाळी ५ वाजता ईश प्रार्थनेने झाली. मांगल्य सेवा संस्थेचे उपाध्यक्ष रवींद्र कुळकर्णी  यांनी प्रास्ताविकातून संस्थेतर्फे वर्षभर राबविण्यात येणाऱ्या विविध सामाजिक उपक्रमांची माहिती दिली. तसेच पितृपक्षात गरजू कुटुंबांना मदत करण्यामागील संस्थेची भूमिका स्पष्ट केली.

यावेळी व्यासपीठावर उपस्थित ब्राह्मण सभेचे उपाध्यक्ष अमोल जोशी आणि श्यामसुंदर कलभंडे यांचा संस्थेचे अध्यक्ष प्रवीण कुळकर्णी व सचिव किरण कुळकर्णी यांच्या हस्ते सत्कार करून सन्मान करण्यात आला.

समाजोपयोगी कार्यातून गरजूंना आधार

मांगल्य सेवा संस्थेचे अध्यक्ष प्रवीण कुळकर्णी यांनी आपल्या मनोगतात संस्थेच्या विविध सेवाभावी उपक्रमांची माहिती दिली. गोसेवा,गरजू रुग्णांना रुग्णोपयोगी साहित्य वर्षभर  उपलब्ध  करून देण्याची सेवा , गरजूंना विविध वस्तूंचे मोफत वाटप, वस्त्रदान, विद्यार्थ्यांना शैक्षणिक साहित्याचे मोफत वितरण तसेच महिलांसाठी सामाजिक , आरोग्यविषयक सेवाभावी उपक्रम मांगल्य संस्थेमार्फत राबविण्यात येतात. समाजातील तळागाळातील गरजूंपर्यंत पोहोचून त्यांना मदत करण्याचा संस्थेचा सातत्यपूर्ण प्रयत्न असल्याचे त्यांनी सांगितले.

ब्राह्मण सभेचे उपाध्यक्ष अमोल जोशी यांनी मांगल्य सेवा संस्थेच्या पितृपक्षातील सेवाभावी उपक्रमाचे कौतुक केले. गरजू व उपेक्षित कुटुंबांना मदतीचा आधार मिळाल्याने त्यांच्या मनात जगण्याची नवी उमेद निर्माण होते. अशा उपक्रमांमुळे समाजात परस्पर सहकार्याची भावना अधिक दृढ होते, असे त्यांनी नमूद केले.

कार्यक्रमाचे अध्यक्ष व करसल्लागार श्यामसुंदर कलभंडे यांनीही मनोगत व्यक्त केले. गरजू व्यक्तींना मदतीचा हात देणाऱ्या मांगल्य सेवा संस्थेच्या कार्यातून समाजाने प्रेरणा घ्यावी आणि अशा सेवाकार्यात सक्रिय सहभाग नोंदवावा, असे आवाहन त्यांनी केले.

उपक्रमाच्या यशस्वितेसाठी पदाधिकाऱ्यांचे परिश्रम

हा सेवाभावी उपक्रम यशस्वी करण्यासाठी अध्यक्ष प्रवीण कुळकर्णी यांच्या मार्गदर्शनाखाली उपाध्यक्ष तथा योगविद्या प्रशिक्षक रवींद्र कुळकर्णी, सचिव किरण कुळकर्णी, राजेश कुळकर्णी, मेरिको इंडस्ट्रीजचे अधिकारी किरण कुळकर्णी, सामाजिक कार्यकर्ते व महाबळ परिसरातील प्रसिद्ध  बांधकाम व्यावसायिक भूपेश कुळकर्णी, स्वानंद कुळकर्णी, ब्राह्मण सभेचे चिटणीस जितेंद्र याज्ञिक, कार्यकारणी सदस्य कमलाकर फडणीस,किरण कुळकर्णी तसेच सौ. कल्याणी कुळकर्णी, सौ. प्राची कुळकर्णी, सौ. दीपाली कुळकर्णी आणि सौ. शुभांगी नाईक यांनी परिश्रम घेतले. कार्यक्रमाचे सूत्रसंचालन प्रसाद जोशी यांनी केले.

पुर्वजांच्या स्मृतींना सामाजिक सेवेची जोड देत गरजू कुटुंबांना मदतीचा आधार देणारा हा उपक्रम समाजातील दातृत्व, संवेदनशीलता आणि सेवाभावाचे महत्त्व अधोरेखित करणारा ठरला.