जगाला ताकद दाखवणाऱ्या सागर माळींची झुंज अपयशी; ‘ज्युनियर रॉनी कोलमन’चे ३८व्या वर्षी निधन

मुंबई : मुंबईच्या शरीरसौष्ठव क्षेत्रातील प्रसिद्ध नाव आणि आंतरराष्ट्रीय स्तरावर भारताचे प्रतिनिधित्व करणारे शरीरसौष्ठवपटू सागर माळी यांचे वयाच्या अवघ्या ३८व्या वर्षी निधन झाले. गेल्या दोन वर्षांपासून ते गंभीर मूत्रपिंडाच्या आजाराशी झुंज देत होते. दोन्ही मूत्रपिंडे निकामी झाल्यानंतर त्यांच्यावर नियमित डायलेसिस सुरू होते. उपचारादरम्यान आज सकाळी त्यांची प्राणज्योत मालवली.

सागर माळी यांच्या निधनाची बातमी समोर येताच मुंबईसह महाराष्ट्रातील शरीरसौष्ठव क्षेत्रावर शोककळा पसरली आहे. अत्यंत धिप्पाड शरीरयष्टी, प्रभावी स्नायू आणि रॉनी कोलमन यांच्याशी साधर्म्य असलेल्या शरीररचनेमुळे सागर यांना मुंबईत ‘ज्युनियर रॉनी कोलमन’ म्हणून ओळखले जात होते.

२०१३ मध्ये ‘मुंबई श्री’ किताबावर नाव कोरले

सागर माळी यांनी २०१३ मध्ये प्रतिष्ठेचा ‘मुंबई श्री’ किताब पटकावत शरीरसौष्ठव क्षेत्रात आपली स्वतंत्र ओळख निर्माण केली. त्यांच्या दमदार शरीरयष्टीमुळे आणि स्नायूंच्या ठेवणीमुळे ते अल्पावधीतच शरीरसौष्ठवप्रेमींमध्ये लोकप्रिय झाले.

‘मुंबई श्री’नंतर त्यांनी ‘महाराष्ट्र श्री’ आणि ‘भारत श्री’ यांसारख्या प्रतिष्ठेच्या स्पर्धांमध्ये सहभाग घेतला. २०१४ मध्ये मुंबईत आयोजित करण्यात आलेल्या ‘मि. वर्ल्ड’ स्पर्धेत ८५ किलो वजनी गटात त्यांनी चौथा क्रमांक पटकावला.

महाराष्ट्र श्रीची संधी थोडक्यात हुकली

सागर माळी यांनी महाराष्ट्रातील शरीरसौष्ठव स्पर्धांमध्येही सातत्याने दमदार कामगिरी केली. २०१६ मध्ये ‘महाराष्ट्र श्री’ किताबाने त्यांना हुलकावणी दिली. त्यानंतर २०२० मध्येही त्यांनी या स्पर्धेत सुनीत जाधव यांना कडवी झुंज दिली होती.

२०१९ पर्यंत सागर माळी हे मुंबईच्या शरीरसौष्ठव क्षेत्रातील एक लक्षवेधी आणि लोकप्रिय नाव होते. मात्र, कोरोना महामारीनंतर त्यांनी काही काळ शरीरसौष्ठवापासून विश्रांती घेतली. त्यानंतर सुरू झालेल्या मूत्रपिंडाच्या गंभीर आजारामुळे त्यांना आपल्या आवडत्या क्षेत्रापासून कायमचे दूर व्हावे लागले.

दोन वर्षांपासून आजाराशी संघर्ष

गेल्या दोन वर्षांपासून सागर माळी मूत्रपिंडाच्या गंभीर आजाराशी झुंज देत होते. त्यांच्या दोन्ही मूत्रपिंडांनी काम करणे बंद केल्यानंतर त्यांच्यावर डायलेसिसद्वारे उपचार सुरू होते.

शरीरसौष्ठवाच्या माध्यमातून आपल्या ताकदीची जगाला ओळख करून देणाऱ्या सागर यांची गेल्या दोन वर्षांपासून आजाराशी सुरू असलेली झुंज मात्र अखेर अपयशी ठरली. उपचार सुरू असतानाच त्यांचे निधन झाले.

कुटुंबीयांवर दुःखाचा डोंगर

सागर माळी यांच्या पश्चात आई, वडील आणि पत्नी असा परिवार आहे. कुटुंबीय परदेशात असल्याने त्यांच्या अंत्यसंस्काराची प्रक्रिया त्यानुसार करण्यात येणार आहे. रविवारी मुलुंड येथील स्मशानभूमीत त्यांच्यावर अंत्यसंस्कार करण्यात येणार असल्याची माहिती आहे.

सागर माळी यांच्या अकाली निधनाने मुंबईच्या शरीरसौष्ठव क्षेत्राने एक प्रतिभावान आणि मेहनती खेळाडू गमावला आहे. त्यांच्या चाहत्यांसह शरीरसौष्ठव क्षेत्रातील सहकाऱ्यांकडून सोशल मीडियावर श्रद्धांजली व्यक्त केली जात आहे.