मुंबई-ठाण्यात कोट्यवधींच्या दहीहंडीची धूम; कुठे किती लाखांचे बक्षीस?

मुंबई : श्रीकृष्ण जयंती आणि दहीहंडी उत्सवाच्या पार्श्वभूमीवर मुंबईसह ठाणे परिसरात उत्साहाला उधाण आले आहे. शहरातील विविध भागांत भव्य दहीहंडी उत्सवांचे आयोजन करण्यात आले असून, गोविंदा पथके थरावर थर रचून हंडी फोडण्यासाठी सज्ज झाली आहेत.

विशेष म्हणजे यंदा विविध आयोजकांकडून लाखो रुपयांच्या बक्षिसांची घोषणा करण्यात आली आहे. त्यामुळे मुंबई आणि ठाण्यातील दहीहंडी उत्सवाला यंदा चांगलेच स्पर्धात्मक स्वरूप आले आहे.
गेल्या महिनाभरापासून गोविंदा पथकांकडून दहीहंडीसाठी जोरदार सराव सुरू होता.

यंदा काही पथकांकडून नऊ ते दहा थर उभारण्याचा प्रयत्न केला जाण्याची शक्यता आहे. पावसाची संततधार सुरू असतानाही गोविंदांचा उत्साह मात्र कायम आहे.

ठाण्यात 71 लाखांच्या बक्षिसांची घोषणा

ठाण्यात आमदार शिवाजीराव पाटील यांच्या स्वामी प्रतिष्ठानतर्फे भव्य दहीहंडी महोत्सवाचे आयोजन करण्यात आले आहे. या उत्सवात तब्बल 71 लाख रुपयांच्या बक्षिसांचे वाटप करण्यात येणार असल्याची माहिती आहे. सेलिब्रिटी दहीहंडी म्हणून या उत्सवाची विशेष ओळख निर्माण झाली असून, राजकीय नेत्यांसोबतच मनोरंजन क्षेत्रातील सेलिब्रिटींचीही उपस्थिती राहण्याची शक्यता आहे.

प्रताप सरनाईक यांच्या दहीहंडीत 21 ते 51 लाखांची बक्षिसे

आमदार प्रताप सरनाईक यांच्या संस्कृती युवा प्रतिष्ठानतर्फेही ठाण्यात दहीहंडी उत्सवाचे आयोजन करण्यात आले आहे. या उत्सवात गोविंदा पथकांसाठी 21 लाखांपासून 51 लाख रुपयांपर्यंतची बक्षिसे जाहीर करण्यात आली आहेत.

रविंद्र फाटक यांची 21 लाखांची दहीहंडी

ठाण्यातील आमदार रविंद्र फाटक यांनीही दहीहंडी उत्सवाचे आयोजन केले असून, हंडी फोडणाऱ्या गोविंदा पथकांसाठी 21 लाख रुपयांचे बक्षीस जाहीर करण्यात आले आहे.
टेंभी नाका दहीहंडीत 25 लाखांहून अधिक बक्षिसे
ठाण्यातील टेंभी नाका येथे दिघे समर्थकांकडून दहीहंडीचे आयोजन करण्यात आले आहे. या उत्सवात 11 लाख ते 25 लाख रुपयांहून अधिक रकमेची बक्षिसे देण्यात येणार असल्याचे आयोजकांकडून सांगण्यात आले आहे.

नौपाड्यात 11 ते 21 लाखांची बक्षिसे

अविनाश जाधव यांच्या पुढाकाराने ठाण्यातील नौपाडा परिसरातही दहीहंडी उत्सव रंगणार आहे. येथे गोविंदा पथकांसाठी 11 लाख ते 21 लाख रुपयांपर्यंतच्या बक्षिसांची घोषणा करण्यात आली आहे.

घाटकोपरमध्ये मनसेची 51 लाखांची हंडी

मुंबईतील घाटकोपर परिसरात मनसेचे गणेश चुक्कल यांच्या वतीने दहीहंडी उत्सवाचे आयोजन करण्यात आले आहे. हंडी फोडणाऱ्या गोविंदा पथकासाठी तब्बल 51 लाख रुपयांचे बक्षीस जाहीर करण्यात आले आहे. या दहीहंडी सोहळ्यालाही सेलिब्रिटींची उपस्थिती राहण्याची शक्यता आहे.
घाटकोपरसोबतच वरळी, दादर, बोरिवली आणि चेंबूर या भागांतही मोठ्या दहीहंडी उत्सवांचे आयोजन करण्यात आले आहे. त्यामुळे मुंबई शहरात दिवसभर गोविंदा पथकांची लगबग आणि ढोल-ताशांचा गजर पाहायला मिळणार आहे.

ठाण्यात 254 दहीहंडींना पोलिसांची परवानगी

दरम्यान, ठाणे शहरात यंदा मोठ्या प्रमाणावर दहीहंडी उत्सवांचे आयोजन करण्यात आले आहे. पोलिसांनी तब्बल 254 दहीहंडी आयोजनांना परवानगी दिली आहे. पावसाची शक्यता लक्षात घेता गोविंदा पथकांची सुरक्षितता, वाहतूक व्यवस्था आणि गर्दीचे नियोजन याकडे प्रशासनाचे विशेष लक्ष असणार आहे.
मुंबई आणि ठाण्यातील या भव्य दहीहंडी उत्सवांमुळे यंदाचा गोपाळकाला उत्सव अधिकच रंगतदार होणार असून, लाखो रुपयांच्या बक्षिसांसाठी गोविंदा पथकांमध्ये चुरस पाहायला मिळणार आहे.