अमिताभ बच्चन यांच्या ‘जलसा’ बंगल्याच्या मालकीवरून वाद; रमोला बच्चन यांनी सांगितला दावा, काय आहे प्रकरण ?
मुंबई – बॉलिवूडचे ‘बिग बी’ अमिताभ बच्चन यांचा जुहू येथील जलसा बंगला कौटुंबिक संपत्ती वादात सापडला आहे. अमिताभ यांच्या वहिनी रमोला बच्चन यांनी १९९३ झालेल्या एका गिफ्ट डीडला आव्हान दिले आहे.
ज्यातून या संपत्तीचा मालकी हक्क जया बच्चन यांच्या नावावर करण्याचा समावेश होता. हा व्यवहार माझ्या सहमतीशिवाय झाला होता असा दावा रमोला बच्चन यांनी केला आहे.
हे प्रकरण आता अंधेरीतील सहकारी संस्था उपनिबंधक कार्यालयात पोहचले आहे. जिथे या प्रकरणाची सुनावणी सुरू झाली आहे. जलसा बंगला अमिताभ बच्चन यांच्या आयुष्यातील एक महत्त्वाचा भाग आहे. ज्यात हजारो चाहते अमिताभला भेटण्यासाठी दररविवारी याच बंगल्याबाहेर गर्दी करतात. जिथे अमिताभ बच्चन आपल्या चाहत्यांना अभिवादन करण्यासाठी येत असतात. माहितीनुसार, अमिताभ बच्चन यांचा छोटा भाऊ अजिताभ बच्चन यांच्या पत्नी रमोला यांनी मागील ७ महिन्यापासून नोंदणीकृत कार्यालयात अनेक तक्रारी दाखल केल्या आहेत. ज्यात गिफ्ट डिडच्या माध्यमातून ही संपत्ती जया बच्चन यांच्याकडे हस्तांतरित होण्यापूर्वी त्या संपत्तीची मूळ मालक त्या स्वत: होत्या असा रमोला यांचा दावा आहे. मुंबई मिररनं हे वृत्त छापले आहे.
काय आहे प्रकरण?
कपोल हौसिंग सोसायटीच्या रेकॉर्डमध्ये जया बच्चन या संपत्तीच्या मालक असल्याचा उल्लेख आहे. परंतु महाराष्ट्र सरकारच्या प्रॉपर्टी कार्डवर अद्यापही रमोला यांच्या नावाची नोंद आहे. सरकारी रेकॉर्डमध्ये रमोला यांचे नाव हटवून जया यांचे नाव नोंदवण्याचा प्रयत्न झाल्यानंतर हा वाद चव्हाट्यावर आला. १९९३ साली कागदपत्रे कशी तयार केली गेली यावरही रमोला यांनी प्रश्नचिन्ह उभे केले. त्यांच्या तक्रारींनुसार, त्यावेळी स्टॅम्प ड्युटी न भरता साध्या कागदावर ‘गिफ्ट डिड’ तयार करण्यात आले होते. त्या कागदपत्रावर साक्षीदारांची स्वाक्षरीही नव्हती. महाराष्ट्र सरकारच्या ‘अभय योजने’अंतर्गत या दस्तऐवजाच्या त्यानंतरच्या नोंदणी आणि नियमितीकरणाबाबतही रमोला बच्चन यांनी प्रश्नचिन्ह उपस्थित केले आहेत.
दरम्यान, रमोला बच्चन यांची तक्रार प्राप्त झाल्याची पुष्टी उपनिबंधक फैयाज मुलानी यांनी केली आहे. सध्या या प्रकरणाची सुनावणी सुरू असून दोन्ही पक्षाला त्यांचा जबाब दाखल करण्यास सांगितल्याचे त्यांनी म्हटलं. या वादावर अमिताभ बच्चन यांच्याकडून कुठलीही प्रतिक्रिया आली नाही. जया बच्चन यांच्याशीही संपर्क झाला नाही. अभिषेक बच्चन यांच्या प्रवक्त्यांनी यावर प्रतिक्रिया देण्यास नकार दिला आणि हा कुटुंबाचा अंतर्गत प्रश्न आहे असं सांगितले असं या वृत्तात प्रकाशित करण्यात आले आहे.
व्हाट्सअप ग्रुप जॉइनिंगसाठी क्लिक करा -
https://chat.whatsapp.com/BpTuswQo5JaGl3dMcIcFlK?s=cl&p=a&mlu=4&ilr=4
जाहिरातीसाठी संपर्क - 7620878766
विशेष टीप - बातमीतील जाहिरातीवर टॅप करून Preview Image हा पर्याय निवडा. त्यामुळे जाहिरात पूर्ण स्वरूपात उघडेल व आपणास प्रतिसाद देणे सोपे होईल.











