मुंबई – राष्ट्रीय स्वयंसेवक संघाचे सरसंघचालक मोहन भागवत यांनी आजच्या तरुण पिढीचा आवाज लोकशाहीसाठी महत्त्वाचा असल्याचे सांगत, तरुणांनी प्रश्न विचारणे आणि मतप्रदर्शन करणे ही सशक्त लोकशाहीची गरज असल्याचे स्पष्ट केले. आंदोलन हा लोकशाहीतील संवादाचा मार्ग असून संवाद थांबला की संघर्ष निर्माण होतो, असेही त्यांनी नमूद केले.
मुंबईतील जिओ वर्ल्ड कन्व्हेन्शन सेंटर येथे ‘आयमन’ संस्थेच्या १५व्या वर्धापनदिनानिमित्त आयोजित परिषदेत ‘जेन-झी’ आणि ‘जेन-अल्फा’ पिढीशी संवाद साधताना ते बोलत होते.
भागवत म्हणाले की, आजचे तरुण केवळ विरोधासाठी आवाज उठवत नाहीत, तर व्यवस्था अधिक सक्षम व्हावी या उद्देशाने प्रश्न विचारत आहेत. त्यांना प्रेम, विश्वास आणि संवादाची अपेक्षा आहे. त्यामुळे त्यांच्या तक्रारी आणि प्रश्न गांभीर्याने ऐकणे आवश्यक आहे. तरुणांना ‘देशविरोधी’ म्हणून दूर लोटण्याऐवजी ते आपल्या समाजाचाच भाग आहेत, या भावनेतून त्यांच्याशी संवाद साधला पाहिजे, असे त्यांनी सांगितले.
आंदोलनाच्या संदर्भात त्यांनी स्पष्ट केले की, लोकशाहीमध्ये आंदोलन हे संवादाचे प्रभावी माध्यम आहे. आंदोलनातून समाजात सहमती निर्माण झाली पाहिजे. मतभेद असले तरी संवाद कायम राहणे गरजेचे असल्याचे त्यांनी अधोरेखित केले.
शिक्षण व्यवस्थेवर बोलताना भागवत यांनी देशात सुमारे १० लाख शिक्षकांची पदे रिक्त असल्याचा उल्लेख केला. दर्जेदार शिक्षण प्रत्येक विद्यार्थ्यापर्यंत पोहोचले पाहिजे आणि शिक्षणावरील खर्च सकल देशांतर्गत उत्पन्नाच्या (GDP) ६ टक्क्यांपर्यंत वाढवण्याची मागणी योग्य असल्याचे त्यांनी नमूद केले.
सोशल मीडियावरील वाढते ध्रुवीकरण आणि दिशाभूल करणाऱ्या माहितीबाबत त्यांनी नागरिकांना सावध राहण्याचा सल्ला दिला. सोशल मीडियावर दिसणाऱ्या प्रत्येक माहितीवर आंधळा विश्वास ठेवू नये. माहितीची पडताळणी करून स्वतःचा विवेक वापरणे आवश्यक असल्याचे त्यांनी सांगितले.
समलिंगी विवाहाच्या प्रश्नावर बोलताना त्यांनी कायद्याबरोबरच समाजाची मानसिक तयारीही महत्त्वाची असल्याचे मत व्यक्त केले. समाज ज्या मूल्यांना स्वीकारतो, त्याच आधारावर कायदे प्रभावी ठरतात. त्यामुळे समाजात सकारात्मक आदर्श निर्माण होणे आवश्यक असल्याचे त्यांनी नमूद केले.
महिलांच्या भूमिकेबाबत बोलताना स्त्री आणि पुरुष हे समान असून एकमेकांना पूरक असल्याचे त्यांनी स्पष्ट केले.
यावेळी अमृता फडणवीस यांनीही तरुणाईच्या भूमिकेवर भाष्य केले. भारताला पाच ट्रिलियन डॉलर अर्थव्यवस्थेकडे नेण्यात जेन-झी आणि जेन-अल्फा पिढीची भूमिका महत्त्वाची ठरणार असल्याचे त्यांनी सांगितले. तरुणांना मोठी स्वप्ने पाहण्याचे स्वातंत्र्य मिळाले पाहिजे आणि ती पूर्ण करण्यासाठी सरकार तसेच विविध संस्थांनी आवश्यक पाठबळ द्यावे, असेही त्या म्हणाल्या.
व्हाट्सअप ग्रुप जॉइनिंगसाठी क्लिक करा -
https://chat.whatsapp.com/BpTuswQo5JaGl3dMcIcFlK?s=cl&p=a&mlu=4&ilr=4
जाहिरातीसाठी संपर्क - 7620878766
विशेष टीप - बातमीतील जाहिरातीवर टॅप करून Preview Image हा पर्याय निवडा. त्यामुळे जाहिरात पूर्ण स्वरूपात उघडेल व आपणास प्रतिसाद देणे सोपे होईल.
