जळगाव : वीज चोरीची कारवाई टाळण्यासाठी १५ हजारांची लाच; महावितरणचा सहाय्यक अभियंता, दोन वरिष्ठ तंत्रज्ञ जाळ्यात
सहाय्यक अभियंता विशाल नेमाडे, वरिष्ठ तंत्रज्ञ भरत तायडे आणि रवींद्र पाटील यांच्याविरुद्ध एमआयडीसी पोलीस ठाण्यात गुन्हा दाखल करण्याची प्रक्रिया सुरू
जळगाव : घरातील विद्युत उपकरणांचा लोड जास्त असल्याचे आणि सर्व्हिस वायर बायपास करून वीज चोरी होत असल्याचे सांगत कारवाई टाळण्यासाठी १५ हजार रुपयांची लाच स्वीकारणाऱ्या महावितरणच्या सहाय्यक अभियंत्याला लाचलुचपत प्रतिबंधक विभागाने (एसीबी) रंगेहाथ पकडले आहे. या प्रकरणात त्याच्यासोबत असलेल्या दोन वरिष्ठ तंत्रज्ञांनाही ताब्यात घेण्यात आले आहे.

विशाल वसंत नेमाडे (३७ वर्षे, पद: सहाय्यक अभियंता, वर्ग-२, महाराष्ट्र राज्य विद्युत वितरण कंपनी मर्यादित, जळगाव शहर महसूल व देयक उपविभाग, जळगाव; रा. प्लॉट नं. ६, काशीबाई उखाजी कोल्हे विद्यालयाजवळ, योगेश्वर नगर, जळगाव), भरत कडू तायडे (४५ वर्षे, पद: वरिष्ठ तंत्रज्ञ, वर्ग-३, महावितरण; रा. प्लॉट नं. ३७, गट नं. १८५/४, न्यू लक्ष्मीनगर, सावखेडा शिवार, कोल्हे हिल्सजवळ, जळगाव) आणि रवींद्र छन्नू पाटील (४१ वर्षे, पद: वरिष्ठ तंत्रज्ञ, वर्ग-३, महावितरण; रा. फ्लॅट नं. २०४, पंडित कॉर्नर अपार्टमेंट, जळगाव; मूळ रा. झुरखेडा, ता. धरणगाव, जि. जळगाव), अशी लाचप्रकरणी ताब्यात घेण्यात आलेल्या संशयितांची नावे आहेत.
नेमकी घटना काय?
यातील तक्रारदार (४० वर्षे) हे जळगाव शहरातील रहिवासी आहेत. १४ नोव्हेंबर रोजी सकाळी ११:१५ वाजेच्या सुमारास वरील तिन्ही संशयितानी तक्रारदारांच्या घरी जाऊन नवीन वीज मीटरची तपासणी केली. तसेच मीटर आणि विद्युत उपकरणांचे फोटो काढले. त्यानंतर संशयित भरत तायडे याने तक्रारदाराला फोन करून जळगावातील पांडे चौक येथे बोलावून घेतले. तेथे तिघांनी तक्रारदाराच्या घरातील लोड जास्त असून सर्व्हिस वायर बायपास करून वीज चोरी होत असल्याचा दावा केला. वीज चोरीचा गुन्हा दाखल न करण्यासाठी आणि कारवाई टाळण्यासाठी त्यांनी तक्रारदारांकडे ४० हजार रुपयांच्या लाचेची मागणी केली. मात्र लाच देण्याची इच्छा नसल्याने तक्रारदाराने तत्काळ जळगाव लाचलुचपत प्रतिबंधक विभागाकडे तक्रार नोंदवली.
पडताळणी आणि सापळा कारवाई
लाचलुचपत प्रतिबंधक विभागाने पंचांच्या उपस्थितीत तक्रारीची पडताळणी केली असता, भरत तायडे आणि रवींद्र पाटील यांनी स्वतःसाठी तसेच सहाय्यक अभियंता विशाल नेमाडे यांच्यासाठी सुरुवातीला ४० हजार रुपयांची मागणी करून तडजोडअंती १५ हजार रुपये घेण्याचे मान्य केले. ठरल्याप्रमाणे पांडे चौक येथे सापळा रचण्यात आला. तेथे तायडे याने तक्रारदाराला लाचेची रक्कम विशाल नेमाडे यांच्याकडे देण्यास सांगितले. त्यानुसार नेमाडे यांनी तक्रारदाराकडून १५ हजार रुपयांची लाच स्वीकारताच दबा धरून बसलेल्या पथकाने त्यांना रंगेहाथ पकडले. याप्रकरणी एमआयडीसी पोलीस ठाण्यात भ्रष्टाचार प्रतिबंधक अधिनियमाच्या कलम सात आणि १२ अन्वये गुन्हा दाखल करण्याची प्रक्रिया सुरू होती. तिन्ही संशयितांना ताब्यात घेण्यात आले आहे.
या पथकाने केली कारवाई
सदरची कारवाई नाशिक परिक्षेत्राचे पोलीस अधीक्षक भारत तांगडे, अपर पोलीस अधीक्षक प्रदीप मैराळे आणि अपर पोलीस अधीक्षक कविता फडतरे यांच्या मार्गदर्शनाखाली जळगाव लाचलुचपत प्रतिबंधक विभागाचे पोलीस उपअधीक्षक योगेश ठाकूर यांच्या पर्यवेक्षणाखाली पोलीस निरीक्षक रेश्मा अवतारे, पोहवा बाळू मराठे, पोकॉ राकेश दुसाने आणि पोकॉ मनोज पाटील यांच्या पथकाने यशस्वी केली.
व्हाट्सअप ग्रुप जॉइनिंगसाठी क्लिक करा -
https://chat.whatsapp.com/BpTuswQo5JaGl3dMcIcFlK?s=cl&p=a&mlu=4&ilr=4
जाहिरातीसाठी संपर्क - 7620878766
विशेष टीप - बातमीतील जाहिरातीवर टॅप करून Preview Image हा पर्याय निवडा. त्यामुळे जाहिरात पूर्ण स्वरूपात उघडेल व आपणास प्रतिसाद देणे सोपे होईल.











